يابت الرجال ماتنسي يوم مولاكي
خليهو اليكون في كل خطوة معاكي
إبليس اللعين لوما إلهنا رعاكي
لي درب الحرام مسكك طويل وداكي
وراعي الله كتير في لبسك اللابساهو
وماتحاكي البنات في نهجها التابعهو
ألبسي لي العفاف من أهلنا ورثناهو
ماتخالفي الشرائع والكتب مابياهو
ياأختي السماحة الطاعمة في الأخلاق
والزول الجميل هو الجملو الخلاق
مامسيح كريم وإسكيرتي فوق الساق
والبس الهدوم كل من وسع أوضاق
اللابسة اخليع كنوها بي الحنكوشة
رادمة وشيها لون ومستعيرة رموشة
قايلاهو العريس حاجة تجيبا قروشة
لكن النصيب حايجيها لومنكوشة
ومرت واحدة غايتو مركبة العدسات
كلاما غريب وبرضو مغيرة العادات
قت لليهم دي مين قالوا فلانة أم عاجات
بت عائلة فلان مغتربة من سنوات
للحديث بقية أتمني أن تنال إعجابكم وأعدكم بمزيد من الرباعيات والقصائد أرجوالنقد من قبل المهتمين بالادب